اللوحة الثالثة
المكان : المستوى الثاني من الديكور حجرة حسنة وهي ممددة فوق الشيزلونج تشاهد لقاء تلفزيونيا مع احدى الفنانات الشاشة تعرض اللقاء (سينوغرافيا).
المذيعة : الجمهور عاوز يعرف إزاي دخلت محراب الفن؟
الفنانة : وأنا صغيرة .. كنت بعشق المسرح والسينما فكان دادي يخدنا كل جمعة لمسرحية جديدة أو فيلم جديد.. وكانت الموهبة بدأت تظهر خالص علىّ (تشير على جسدها وتمسك وسطها) ثقافة ايه وتدريب ايه ..يعني دخلت الفن من أوسع أبوابه .
(حسنة تجلس و تبحلق فيها ثم تنام مرة ثانية)
المذيعة : ايه الصعوبات اللي قابلتك كفنانة؟
الفنانة
المذيعة
الفنانة :
:
: الغيرة ياحبيبتي.. غيرة الفنانات من نجاحي وحتى الفنانين كانوا بيغيروا مني.
طبعا ما أنت طلعتي بسرعة الصاروخ.
(تتنهد) الحقد كان هيكضى علىَّ ..لولا أن فنى أصيل ومتمسك بيه زي ما أنا ماسكة فيه.
حسنة : بنت الـ.... هو برضه اللي متمسك بيك .. إن ماكنش طردك مية مرة وترجعي تبوسي كعب جزمته (تشد شعرها وتكتم صرخة (بالخدادية) ياولاد اللي وكلاها والعة آه..آه
دلال : (تدخل فتشاهد أفعال حُسنة ..تتراجع خائفة تلمحها حُسنة تنادي عليها)
حسنة : تعالي هنا .. تعالي شوفي بنت الـ.... الفنانة تربية العوالم بتقولك دادها .. أبوها يعني كان بيخدها المسرح كل جمعة (مغتاظة) طبعاً ..علشان تمسحه وتلم فضلات الممثلين .
دلال : مش مهم .. المهم بقت نجمة ..ألا ..ألا قوليلي يا أبلتي هو أنت ليه يعنى مع أنك رقاصة كويسه محدش عرفك قوي ..يعني غير اللي رقصتي لهم بس والنبي من غير زعل .. والنبي(تخبئ وجهها).
حسنة : أصلي رقاصة وبس .
دلال : هو فيه حاجة تانية؟! (تقوم بحركة تدل على المكر)
حسنة : آه ياحبيبتي .. قوليلي يا ختي أنت صبية عالمة ولا لبيسة ولا سكرتيرة.. ياعمية القلب يا حشرية معشرانى خمس سنين ولسه معرفتنيش.. أنا يا بت لو كان ليه في غيرالرقص ..كان زماني حاجة تانية (تنظر للشاشة التي مازالت تعرض اللقاء )
المذيعة : قرينا في المجلات أنك بتروحي لسحار في قرية بعيدة .. يسحر للمنتجين وعلشان كده .. نمسك الخشب كل يوم تمضي عقد جديد.
الفنانة : ( منتفضة ) لأ اسمعي .. ستوب .
المذيعة : ستوب ايه يا مدام البرنامج على الهوا يا أفندم .
الفنانة : أوه .. حقيقي .. أسفة .. أعصابي فلتت .. اعتذر لجمهوري الحبيب طب..أخبار الفواصل إيه عندكم ؟
المذيعة : فاصل ونعود .
حسنة : عاوزة فاصل علشان تردح لها براحتها .. ردح مخصوص اتعلمت في مدرسة دادها بنت.... أبوها.
( حُسنة تنتفض واقفة )
حسنة : هاتي لي نمرة المذيعة دي لازم بكره الصبح تكون عندي آه .. ما أنا لازم أشوف لي حل وكمان كلمي نهال بتاعت التواصل .. تواصل قال خليها تيجي بكره .. أعملي مؤتمر صحفي بس كل واحدة لوحدها آه .. ما أنا لازم أشوف حل (مغتاظة) آه لازم .
دلال : تعالي ياحبيبتي والنبي ما تقهري نفسك تعالي أدلك لك جسمك الملبن ده بعد العلقة اللي كسرتي بيها المجنونة اللي كانت هنا.
حسنة : متفكرنيش عاوزه أنسي .
دلال : مينفعش ننسي .
حسنة : نفسي أنسى .. نفسي أغمض عيوني مرة واحدة وأنسي آه ياني يالي شايلة هم نفسي ومحدش شايل همي حتى الفلوس مش شايلة همي .
دلال : هو أنت معندكيش قرايب؟
حسنة : (تنظر إليها تتنهد ولا تنطق)
دلال : أأيوه أيوه .. أمك بقى ماتت بعد ما اشتغلتي رقاصة وأبوك مسجون فاهمه ..فاهمه.. ( تهز رأسها بينما حُسنة ترفع التليفون تريد أن تخبطها به .. لكن دلال تقفز بعيداً)
دلال : ايه يا أبلتي بضحك معاك مش كل الرقاصات بيقولوا كده.. أضحكي كده متشيليش للدنيا هم .. طيب والنبي تفضفضي .. نفسي أعرف حاجات كتير عنك .. اتكلمي كده وبحبحي ده ميدومش غير صحوبية الست للست .
حسنة : عاوزه تعرفي ايه؟ أنا كنت طفلة عادية في مدرسة لحد ما مات أبويا ..وكان موظف محترم .. أمي أتجوزت راجل ....
دلال : أيوه.. أيوه فاهمة عينه زايغة عاكسك .. هربت بقى والحاجات دي (تهز رأسها) فاهمة..فاهمة
حسنة : (تنتفض ) يخرب بيتك أنت ايه.. أنا غلطانه إني بتكلم معاك أصلاً .. فكراكِ بنى آدم .
دلال : خلاص وحياة رحمة أبوك اللي لسه ميت دلوقت (تشير لمكان جلستهما) مش هفتح بُقي تاني والنبي اتكلمي .
حسنة : طيب لما أشوف.. هو كان راجل من غير قلب ، فاكر أنه اتجوز أمي وأنا على البيعة .. لما دخل بيتنا دخل طمعان في جمال أمي .. ماهي كانت زي القمر الله يرحمها .
دلال : شكلك كده يا أبلتي؟
حسنة : أحلى .. وبعد ما خلاني سيبت المدرسة بدأ يطلب حاجات مش كويسة .. قلت لأمي .. أتخنقت معاه .. بعد كده كان بيجيب رجاله أصحابه ، وقال إيه يسيبهم وينزل يشتري حاجات ويسبني أنا وأمي في البيت معاهم .. أمي خافت عليه أخدتني وهربنا كان عندي ستاشر سنة .
دلال : صغيرة ياحبة عيني.. وبعدين عملتوا إيه؟
حسنة : اشتغلت كل حاجه إلا حاجة واحدة وأموت ومش هعملها .. (تنظر للتلفزيون..ثم تعود لتحكي) حتى لو كان ده هيعمل مني نجمة .
دلال : مش كلهم يا أبلتي .
حسنة : عارفه أنا بتكلم عن نفسي .
دلال : أمال الرجاله الكتير اللي كانوا بيعرفوك دول يعني... يعني.. والنبي أنا أفتكرت!!
حسنة : دول يبصوا بس يلمسوا .. لأ.
دلال : وليه متجوزتيش .. بجد ومن غير نخع. يعني ده موقف منك ازاي يعني؟! هه.
حسنة : لأ .. بصراحة هو موقف من الرجالة.. يعني مفيش راجل واحد في عمري دا كله بص ناحيتي باحترام.. كلهم شايفين حُسنة الرقاصة الحلوة .. حتة لحمة بيضا وبس.. نفسي حد يحترمني ويعتبرني بتاعته هو بس مش .. يصدق إني له واحده مش هيئة ولا جمعية يعني لكل الرجاله.. نفسي في راجل ما يخونش.
دلال : يبقى هتفضلي عذراء على طول .. هو فيه راجل ما بيخنش على رأي أمي البنات تتولد تقول يا حنان والصبيان تقول يا خيانة .. تعرفي أخويا يوم ما أتولد بصبص للداية.
حسنة : الله يحظك يا دلال نستينا الهم .
دلال : بس أنت يعني لما بطلتي الرقص ليه مفكرتيش تحجي كده وتروحي الحج زي ما بنشوف ونسمع؟
حسنة : ليه هي التوبة في مصر الجديدة حُرمت وبعدين يابت أنا صفحة بيضا.
دلال : صفحة بيضا ولا لحمة بيضا ركزي.
حسنة : أنت يا بت عماله تقرري فيه من الصبح .. هو فيه إيه مالك (بالسي فيه) بتاعي عندك عريس ولا مخابرات .
دلال : ليه هو أنت حُسنة الهجان .. بنضحك مع بعض ما كنت من شوية بتقولي يا دولي وآخر دلع .
حسنة : لكن صحيح يا دلال إنت ليه اشتغلت لبيسة ولا مرة رضيتي ترقصي مع أني كان ممكن اعلمك .. لو خسيتي شوية وبطلتي لغ وحتى لو محصلش أهو كنت هتبقي رقاصة من العيار الثقيل( تضربها على مؤخرتها)
دلال : أهو أنت قولتيها .. وبعدين زي ما حدش بيختارأمه وأبوه ماحدش برضه في البلد دي بيختار شغلته.
حسنة : أنا يا بت حاسه أنك بتفهمي .. ساعات كده تقولي حاجات غريبة.
( جرس الباب يرن)
دلال : يا قاعدين يكفيكوا شر الجايين .. أشوف مين وأرجع لك
(تفتح دلال الباب تدخل دكتورة ميرام مسرعة وتجلس وتشعل سيجارة .. يضاء المستوى الأول في المكتب ويظلم المستوى الثاني)
دلال : خير يا دكتورة اللهم اجعله خير الساعة اتناشر حد يروح لحد دلوقت .. ثم صاحبتك مشيت من بدري .. والأستاذه كانت هتنام .
ميرام : صحيها لو نامت عاوزاها بسرعة .
دلال : اللهم اجعله خير.
حسنة : (تدخل عليهما) مين يا دلال .. هو إنت .
ميرام : أسفة على الإزعاج .. حبيت أشوفك ( تلف حولها منبهره بحُسنة فى قميص النوم ) ونتكلم لوحدنا بعيد عن زحمة المكتب والزبائن .
(دلال تنظر حولها بتعجب)
حسنة : مفهوم.. مفهوم..اتفضلي..بس الميعاد متأخر شوية.
ميرام : بالنسبة للي هقوله لأ .
دلال : آه .. هو الموضوع كده .. إزاي بس دا الاثنين مزز .. دنيارات آخر حلاوة .
حسنة : ( تتوعد دلال بيدها ) بس لما تمشي (لميرام) خيربس إياك يا دكتورة يكون موضوع المجنونة اللي كانت هنا من ساعات ..أنا ما صدقت خلصت منها.
ميرام : لسه مخلصناش .
حسنة : مخلصناش ( تشير بيدها علامة الجمع)
ميرام : أيوه .
حسنة : لأ براحتك أنت بقى أنا خلصت منها ولو رجعت هنا تاني .. أنا بقى اللي يا قاتله يا قاتله مش هي .
ميرام : إهدي يا مدام .
حسنة : أنسة يا حبيبتي ويا ريت مترفعيش الكلفة قوي كده .. يعني قولي استاذة (لنفسها) بلاوي إيه دي يارب.. شوفي يا دكتورة صاحبتك دي مخها فوت خلاص .. دي بتحاسب الراجل على الحلم والخيال .. دي .. دي كارثة إنسانية واسمها قدرية.
ميرام : علشان كده لازم ننقذ لطفي .. لازم يخلص منها أو تخلص هي منه .
حسنة : وبعدين بقى.. ماتخلي الليلة دي تعدي على خير يا ستي حرام عليكم والله حرام .. أقولك أنا هقفل المكتب ده علشان ترتاحوا.
ميرام : ماهو لو معملتيش اللي هطلبه منك.. هيتقفل برضه .. بس بفضيحة يا سنسن .. مش ده اسم الشهرة برضه يا ست حسنة .
حسنة : قصدك إيه؟!
ميرام : يعني المكتب ده مفتوح من غير ترخيص ولا موافقة أمنية ولا أي حاجة .. وبيديره رقاصة درجة تانية .." سوري" .. واللبيسة بتاعتها السكرتيرة .. يعني واحدة إعدادية والثانية دبلوم.. بينصبوا على الناس .
حسنة : دبلوم مين معاها دبلوم .. اتكلمي بسرعة (تنظر لدلال التي تخبئ رأسها وتلطم خدودها).. قولي بسرعه قصدك البت دي معاها دبلوم.. دبلوم إيه.. آه شكلها كده تجارة آه .. أمال النقطة كانت بتروح فين!!
ميرام : اهمدي كل اللي همك .. مين اللي واخد دبلوم هوأنا قلت دبلومة عليا .. يعني الكلام اللي قبله ملفتش نظرك!!
حسنة : آه قصدك التهديد .. أنا يا حبيبتي ما بتهددش آه
(تنظر لدلال تتوعدها)
ميرام : أنا مش بهدد أنا بوضح بس .. المسألة ممكن تمشي عال العال لو فتحتي مخك معايا . وافتكرتي أنه ما بيدومش إلا صحوبية الست للست .
حسنة : إنت عاوزة ايه بالظبط!
ميرام : عاوزه لطفي .
حسنة : آآه.. قولي كده .. الحكاية كانت باينه والهبلة فاكراك قابضة منه .. متعرفش إنك هتقبضي عليه .
ميرام : فهمتيني يا أستاذة .. كده بقينا على نغمة واحدة.
دلال : مش قلت لك يا أبلتي شكلها ساقط ثانوية عامة وبنت كار.
ميرام : إخرسي .
حسنة : خليكي معايا وأنا أعمل لك إيه .. أديلك لطفي إزاي ..هو فستان هقلعه ليها وأديهولك .
ميرام : لأ .. راجل فنان عاطفي.. كل اللي يهمه فنه وست تفهمه .. تحبه .. توفر له وقت يبدع فيه ولطفي حساس جداً .. وأنا أقدر أوفر له الجو ده يعني تقدري تقولي أنا بدور على المواصفات دي في الراجل اللي نفسي اتجوزه .
حسنة : يعني أنتم مش بتحبوا بعض؟!
ميرام : مؤكد هيحبني لأنه مش عاوز غير ست زيي كده.. وبعدين قدرية عقدته من الستات ..( بغرور) أنا بقى هفكه .. شغلتي .
دلال : أنا قلت كده برضه.
حسنة : طيب وأنا أعمل كده ليه.. ايه مصلحتي.. وسيبك من صحوبية الست للست (تنظر لدلال) شيلي اليافطة دي.. احرقيها .
ميرام : غير اتعابك . هعمل لك دعاية كويسة وممكن أبعت زباين لك.. رغم أني( ضاحكة) عارفه البير وغطاه.
دلال : (تحمل اللافتة) أنا البيروغطاه أنا حافظة الأسرار .. قصدك إيه يعني .
حسنة : بس يا دلال اخرسي ..(لميرام) بس ده مش كفاية علشان أخرب بيت واحده وثقت فيه علشان أعمر بيتك .
ميرام : البيت مخروب مخروب.. دي متوحشة هو خلاص مش راجع ولو وقفت على السجن .. السجن أرحم.. إحنا عاوزينها بس تتنازل عن المؤخر .. أنا لو كان عندي فلوس .. كنت ساعدته .. بس أنا لسه خالعه جوزي الأول .
حسنة : يعني مطلوب مني أخليها تتنازل عن مؤخر الصداق
ميرام : بالظبط .
حسنة : بس ده صعب دا أنا لسه رناها علقة وطردتها.
ميرام : اتصرفي .
(دلال تهمس فى أذن حسنة التي تضحك وتهز رأسها)
حسنة : موافقه بس فيه شرط تاني .
ميرام : ايه هو.
حسنة : تشتغلي معايا .
ميرام : أنت أتجننتي .. أنا دكتورة أمراض نفسية وعصبية.
حسنة : عارفة وإحنا محتاجين مستشارة نفساوية تساعدني .
ميرام : أكيد....
(حُسنة تقاطعها)
حسنة : تهديد أنا ما بتهددش .. ممكن أقفل المكتب ومش عاوزه وجع دماغ.. هتستفيدي ايه من سجني .. ثم المخالفات في البلد على قفا مين يشيل .. ديتها قرشين وكله يتظبط.. دا غير إني ممكن أحكي لقدرية عن مدى إخلاصك الواضح قوي وشوفي أنت بقى قدرية هتعمل ايه .
ميرام : (تصمت برهة لتفكر) أوكيه موافقة .. بس اسمي يفضل في السر
حسنة : سر ليه يا حبيبتي هو إحنا بنسرق .. في العلانية .. وعلى عينك يا تاجر.
ميرام : أوكيه.. بس الإتفاق بتاع لطفي هيفضل سر.
حسنة : ماشي الكلام يا سعادة المستشارة .
ميرام : دا أنت اللي استاذة (لنفسها) محدش يقدر على عالمة صحيح..تعالي بقى أشرح لك هنعمل ايه وانت بتوصليني للباب(تأخذان في الخروج من المسرح)
دلال : أنا شكلي كده طينتها كان قصدي أهوشها..الموضوع كده هيبقى بجد..الله وأنا هفضل طول عمري مرمطون..يعني مش حُسنة بس اللي هتبهدلني..لأ والمزة دي كمان.. بس على مين هاعرف أفكر وأتصرف .. دا أنا دلال .. دولي .. بس الصباح رباح(تنادي) : أبلتي ياله علشان تنامي ..تنامي(تترقص وهي ماشية) تنامي آه .
( تجري خارجة خلف حُسنة)
إظلام
