الختام
المكان : قاعة بها مقاعد مصفوفة ومنصة خلفها لافتة مكتوب عليها ( رؤية جديدة للمرأة فى الألفية الثالثة .. المشكلة .. الحل )
وفى الركن بوفيه شاي .. وبعض السيدات تقفن لشرب الشاي والأخريات جالسات والبعض يتحدث أحاديث جانبية وفيهم نهال الصحفية وسناء المذيعة يتحدثان ما يشبه الخناق تدخل حسنة فى ملابس محتشمة ومعها دلال والسيدتان أعضاء جمعية حماية المتضرارات تجلس حسنة والسيدتان على المنصة والنساء تتجه لمقاعدها .. يمكن الاستعانة بالراقصات لملئ الفراغ المسرحى .
امرأة رقم1 : اليوم ندوتنا لها مذاق خاص .. مذاق مختلف لأننا اليوم نستضيف امرأة مختلفة.
دلال : ( وسط الصفوف ) وبعدين بقى.. متخلفة إزاي انتوا جايبينا هنا تهزقونا.
( السيدة التي بجوار حسنة .. تسكتها بإشارة من يديها .. فتسكت دلال )
امرأة 1 : ( مكملة ) السيدة حسنة الراقصة المعتزلة و ...
حسنة : ( منزعجة ) انتوا كنتم عارفين ؟!!
( تدخل ميرام وقدرية القاعة تجلسان صامتتين .. شكلمها تتواعدان حسنة )
امرأة 1 : اهدئي يا ست حسنة.. الموضوع مش زي ما أنتي فاهمة .. حالاً هتعرفي.
حسنة : ماشي.. بس افتكروا إني في ضيافتكم يعني بفكركم بس.
امرأة 1 : ( مكملة ) تلك الراقصة التي أمضت من عمرها خمسة وعشرين عاماً فى الرقص .. اليوم تختلف.
دلال : لأ.. بقه يالله يا ابلتي.
حسنة : ( تشير لها أن تجلس فتجلس )
امرأة 1 : أرجوكم مش عاوزين مقاطعة وكل واحدة هتقول اللي عاوزه تقوله بعد كده .. هذه السيدة (تشير نحو حسنة) قررت تغيير نمط حياتها وهذا فى حد ذاته موقف يحسب لها.
دلال : آه وهى صاحبة مواقف.. دي كل حياتها مواقف.
امرأة 1 : ( متأففة ) كثير من النساء .. وخصوصاً لو معاها فلوس تحب تعيش على الهامش .. حسنة لأ .. حسنة قررت تغير حياتها وتساعد فى تغيير حياة الآخرين .. النهارده هيكون حوار مفتوح مع حسنة؛ صاحبة مكتب لحل المشاكل الإجتماعية ولأن المشاكل الإجتماعية تخص الطرفين الرجل والمرأة فهي تساهم بشكل كبير فى حل مشاكل المرأة.
حسنة : ( مرتبكة وغير فاهمة ما يقال بشكل جيد ) آه .. صح أمال ايه .. شكراً .. شكراً .
امرأة 1 : هتقوم بإدارة الحوار زميلتي على المنصة .. اتفضلي.
امرأة 2 : النهارده معانا ضيوف.. لأول مرة يشرفونا دكتورة ميرام والسيدة قدرية.
( تدخل منال تشير لحسنة بسعادة )
امرأة 2 : أهلاً وسهلاً (تكمل) ومنال ونهال وسناء إعلاميتان وباقي أعضاء الجمعية .. برحب بيهم و..
( تدخل داليا رضا هاجمة على المكان ومعها ورقه وتجلس فى الصف الأول مكان واحدة بعد أن تدفع بها من مكانها .. ومن وقت لآخر تشير لحسنة بالورقة وحسنة تدير وجهها بعيداً عنها)
امرأة 1 : ممكن نسمع من حسنة رأيها فى بعض الأمور، وممكن نستفيد بخبرتها فى حل بعض مشكلاتكم بشكل سريع ومجاني.. بعد إذنها طبعاً.
حسنة : آه طبعاً .. ما هو يوم جاي عليه بخسارة هأ هأ (بتوتر) بضحك طبعاً.
مشاركة رقم 1 : ممكن تقولي لينا لماذا يكره الرجل سواء كان زوج أو زميل فى الشغل أن تنجح الست ؟!
حسنة : مش كلهم .. فيه رجاله حلوه برضه.. بس هيه مسألة ضماير بقى.
مشاركة رقم 2 : أنا اسمي زينب موظفة فى شركة كبيرة ناجحة جداً فى شغلي وجوزي بيشجعني ( تتنهد ) فى الأول بس يعني بعد كده بدأ يشك فيه ويقول لى.. إنت ناجحة وشارخه كده إزاي؟!
حسنة : شارخة يعني إيه؟
مشاركة رقم 2 : أني صعدت السلم الوظيفي بسرعة.. المشكلة مش فى كده المشكلة فى المفاجأة.
حسنة : آه.. إنتي عندك مفاجأت إنتي كمان ؟ ( تنظر لقدرية التى تتنمر لها )كملي ربنا يستر.
مشاركة رقم 2 : أيوه.. قالي أنا كنت مبسوط إن ممكن الست الوحشة تنجح من غير واسطة جمالها .. ويظهر أني فهمت غلط لأنك مش بس نجحت دا إنت افتريتي.. سفر وترقيات كل ده ليه ومعندكيش واسطة كل ست .. (تطرق) يقصد أني.. أني .. مش.. شكلا ؛ قصدى وحشة.
حسنة : والنبى ما تخدي على خاطرك مفيش ست وحشة .. فيه ست متعرفش تبقى حلوة .. وبعدين هو ده يزعلك دا المفروض أنك تبقى سعيدة يا خايبة .. ده دليل على أنك أذكي من رجالة كتير وإنك شاطرة .. مش لونة وعوجة .. معروف إن الحلوة بتفوز علشان جمالها واسطتها زي جوزك ما بيقول كده لكن انتي شطارتك هى واسطتك.
مشاركة رقم 2 : المشكلة مش بس كده.. ده معناه أنه فاقد الثقة فيه..ومش كده بس لأ.. كمان شايفني قرد.
مشاركة رقم 3 : عادي جداً هما كده عاوزين كل حاجة تبقى ليهم ولو نجحنا يبقى من تحت جناحهم وبفضل رعايتهم وكأن احنا عندنا مهلبية فى راسنا وهما عندهم مخ.
دلال : ( تشد زينب تجلسها ) والنبي ما تزعلي نفسك ما كتير زي القمر ولا بيفهموا ..إ من كام أسبوع بس.
( تشير إلى حسنة )
حسنة : (تهمس لمديرة الندوة) طلعوا البت دى بره .. هتفرسني.
امرأة رقم 2 : أرجوكم الهدوء .. كل الأسئلة هتطرح، وكلها هتتجاوب الست حسنة معانا لحد نهاية الندوة.
مشاركة رقم 4 : عندي مشكلة عاوزه ليها حل بسرعة أرجوكِ يا ست حسنة.. أنا جاية مخصوص النهارده ومعرفش إنك إنت اللي موجودة.. بس لازم حد يقولي على حل.
حسنة : قولي يا حبيبتي سمعاكي.ِ
مشاركة رقم 4 : أنا ارتكبت جريمة.
حسنة : يالهوي .. جريمة .. دي عاوزه فرع تاني .. أنا بحل مشاكل مش جرايم.
مشاركة رقم 4 : الجريمة فى حق نفسي .. واحدة صاحبتي الله يخرب بيتها زي ما خربت بيتي قالتلي.. خدي بالك الرجاله مش بتحب الست الذكية .. اعملي نفسك غبية علشان يحبك ومن يوم ما اتجوزت وأنا بسمع كلامها .. لحد الشهر اللي فات وصلتني ورقة من مكتب مأذون .. بيعرفني فيها إن جوزي اتجوز عليه.
حسنة : منه لله.. ليه كده كان ناقصه إيه ؟!
مشاركة رقم 4 : سألته نفس السؤال .. قالي كان نفسي فى ست تشاركني أفكاري ويكون بينا حوار .. مش واحدة كل همها تحشى بطني وتخيط هدومي.. ست عندها حد أدنى من الذكاء تقدر تحاورنى بيه.. وأنت يمكن تكوني أم طيبة، لكن مش زوجة زي اللي أنا حلمت بيها.
حسنة : عنده حق.. زي واحدة مفترية عملت كده فى جوزها وفى الآخر تقول: خسارة يا اسمك ايه كان نفسي تحبني ..
( قدرية تحاول أن تقوم من مقعدها وميرام تشدها) شوفي يا حبيبتي إنتي السبب لازم تحبي نفسك قبل ما تطلبي من غيرك يحبك .. تحترمي نفسك علشان غيرك يحترمك.
دلال : ( للمشاركة رقم 4 )
لكن إنتِي مش غبية ؟!
المشاركة رقم 4 : لأ.. أنا عملت نفسي غبية.. سمعت كلام صحبتي.. علشان مايخفش مني ويفضل يحبني.
حسنة : تبقى غبية .. اللي تسمع كلام من غير ما تفكر فيه بتبقى غبية.
نهال : ممكن إنتِي تتغيري لدرجة إنك تحلى مشاكل الناس دي يا حسنة .. يعني ممكن مشاكل فى الخطورة دي؛ إنتِي اللي تحليها ؟!أو حتى يكون لكِ رأى فيها !! أنا مش بهاجمك أنا بس بطرح رأيي.
دلال : ما تقعدي ياختي.. اسم الله عليكِي إنتِي يعني اللي تعرفي تحليها.
سناء المذيعة : لأ أنا ولا أنتِي ولا هى .. مشاكلنا عاوزانا كلنا نتكاتف ونحلها.
ميرام : ( تقف متحفزة )
الموضوع ده بالذات يحتاج لمناظرة مع الرجاله .. وبدل ما تقعد رقاصة تفتي فيه .. فين الأساتذة والمثقفات وأصحاب الأقلام والنظريات ..لازم نحط الشخص المناسب فى المكان المناسب .. الحكاية مش ندوات وشوية ستات تصرخ وتصريحات فى جرايد وتليفزيون .. وفى الآخر رقاصة!! يا أساتذة هى اللي بتحل رقاصة وكأننا بندعوا الستات كلهم يبقوا رقصات.
قدرية : احنا بنرفض إن واحدة زي دي تتكلم باسمنا.. دى ممكن ترقص لنا تسلينا.. لكن تحل همومنا ومشاكلنا ..دى تبقي باظت.
داليا فؤاد : كفاية .. كفاية .. ورقة العرفي أهي..(لميرام) مش أنتِي جاية علشان تنتقمى منها علشان لطفي ؟ أنا عارفة (لقدرية) وأنتي جاية ترجعي لطفي ؟(لحُسنة) وأنتِي عاوزه تبقى واحدة تانية علشان لطفي ؟ يعني لطفي هو سبب كل البلاوي لطفي يبقى جوزي.. والورقة أهى .. الورقة أهى.. الورقة أهى (تمزقها)
(تضحك ) إنت طالق يا لطفي طالق أنا حرة من غير ما تهرب مني (تضحك).
حسنة : الوحيدة اللي بتفهم .. بس أنا يا .... تطلعي داليا .. تطلعي رضا عمري ما جريت ورا راجل .. ولأني لأول مرة كنت بحب حسيت إني لازم أدافع عن حقي بس اكتشفت إن حقي مش عند لطفي .. حقي عند دول ( تشير للصالة )
حقنا كلنا عند دول علشان كده ( تقف حسنة عند حافة المسرح وتنادي)
بس كفاية تمثيل..اقفلي الباب هناك ( تشير لأبواب المسرح التي يقف عليها بودي جارد بنات يغلقن الأبواب ويقفن من الداخل عليهن دائرة ضوء ) ولا واحد من الرجالة اللي هنا يخرج .. لازم النهاردة نعرف .. احنا جبناكم هنا علشان نعرف.. احنا رايحين فين.. عاوزين الست ترقص ولا ترأس !! عوزينها جنبكم ولا وراكم.. لينا صوت ووجود ولا لسه ماريونت .. عاوزين نعرف ولازم هنعرف ؟! عاوزين حسنة.. ولا دلال.. ولا قدرية .. ولا ميرام .. ولا منال.. ولا داليارضا.. ولا زينب .. ولا ... ولا ...
( الكل على خشبة المسرح يقف فى حالة تجمد أثناء كلام حسنة )
مش لازم تردوا دلوقت .. عاوزينكم تفكروا .. هنوزع عليكم ورق جاوبوا ورجعوه.. بس و أنتوا بتكتبوا رأيكم .. اتأكدوا أنكم بترسموا بكره بعقلكم مش بخيوط الماريونت يالله بينا نقطع الخيط اللي ملفوف من زمان بين صوابعكم.. خلوا الحب هوّ اللي يربطنا بيكم.. اتأكدوا انكم عاوزين شريك مش تابع فكروا كويس .. يمكن نرجع نحب بعض .. يمكن ترجع فى زحمة الشوارع تعرف تسمع دقة قلبك بتنادى على نصك التانى .. يمكن نتقابل زى آدم وحوا .. ونبدأ خلق جديد .. لأن القضية مش خلاف؛ القضية اختلاف فى الطبيعة والتكوين ولازم نكمل بعض زى ربنا ما فكر فى بداية الخلق .. ولو كان عاوزها كلها رجالة كان قال كن فيكون ..يالله يا ستات وزعوا الورق..هيه دي رقصتي الأخيرة ورقصتكم أنتم كمان.
( تنزل البنات توزع الورق على الجمهور )
واسمحوا لى أرجع تانى حسنة الرقاصة.. اللى غيرت رأيها وحبت فكرة أن العلم فى الراس والكراس .. واللى هتفضل تلعب نفس اللعبة كل يوم ..ومش هتغير جلدها.. لحد ما تردوا على السؤال .. أنتوا عايزين ايه ؟ واحنا عايزين ايه ؟؟؟
افتحى الباب هناك .. ولعوا النور .. بس مش هنقفل الستار
فُتح الستار
هالة فهمى
نساء ماريونيت
مسرحية
هـالة فهمى
